Surpiglian maschinas il scriver creativ? Dapi circa in decenni emprendan ils algoritmus adina dapli novs pensums. Els ordineschan, selecziuneschan, communitgeschan – e scrivan. Grondas bancas da datas evalueschan els en moda supersvelta. Dumondas cumplexas respundan els precisamain. Quests algoritmus han l'abilitad d'emprender e vegnan vendids sco «intelligenza artifiziala». Èn els però er abels da scriver litteratura?

En l'exposiziun «Scriver» dat ina intelligenza artifiziala respostas. Ella ha legì enormamain blers texts da Robert Walser e dad Emmy Hennings. Ed ha mussà a sasezza da scriver sco quels dus. En l'exposiziun pon las visitadras ed ils visitaders definir in tema. L'intelligenza artifiziala respunda cun in text en il stil da Walser u da Hennings. Quant bain che quai gartegia, decida la visitadra u il visitader:

Intelligenzas artifizialas che scrivan litteratura? Quai pon esser siemis. Durant ils ultims onns è il scriver sa midà fermamain: risplis electronics per il tablet, la funcziun da dictar sin il smartphone u ils chatbots preprogrammads sa chapeschan oz en noss mintgadi. La transfurmaziun digitala ha accelerà questa midada.

Gia durant ils 150 onns precedents è il scriver però adina puspè sa midà. In sguard en l'Archiv svizzer da litteratura mussa, co che la mecanisaziun e l'automaziun dal scriver èn vegnidas pratitgadas e propagadas dapi l'industrialisaziun. Perditga da quai dattan divers instruments da scriver d'auturas ed auturs, uschia er lur confruntaziun litterara cun lur squitschaders a guglias u cun lur chalimars.

Ils novs instruments da scriver pretendan novas rutinas da lavur. Per exempel il dictat: Er qua han programs digitals surpiglià la lavur. Els reconuschan la lingua discurrida e l'elavuran automaticamain en in text. Quant precis che questa tecnologia lavura actualmain, pon las visitadras ed ils visitaders testar en l'exposiziun. Ellas ed els scrivan cuminaivlamain in text cun agid d'ina software da reconuschientscha vocala. Sche questa dira emprova gartegia, sa mussa en il text survart.

Sch'in visitader scriva vinavant vi dal text da sia antecessura, fa quai endament las metodas da scriver dadaisticas sco il Cadavre Exquis. En la collavuraziun duai sa sviluppar insatge nov, insatge nunprevisiblamain creativ. Il dictar ha er ina vart fitg convenziunala. Betg mo en scola, mabain er tar auturs. Durant il 20avel tschientaner dictava l'autur masculin savens a sia secretaria feminina. Ina situaziun da scriver, en la quala ils stereotips usitads da pussanza e da schlattaina vegnivan reproducids. Friedrich Dürrenmatt ha persiflà quests stereotips en sia atgna moda e maniera: En ses fragment «La secretaria» tippescha l'impiegada durant la notg da nov ils sbozs dubius da ses schef scrivent e sa prenda la libertad da far londeror litteratura acceptabla.

Il scriver giu vegn insumma sutvalità. Rescriver in manuscrit en scrittira da maschina po per exempel esser in grond art. Quai po esser uschia pervia da la realisaziun speziala da la scrittira a maun, sco tar ils micrograms da Robert Walser. U pervia d'ina scrittira nunenconuschenta, sco en il cas dal titular svizzer dal Premi Nobel da litteratura Carl Spitteler. Carl Spitteler stueva transcriver sez las notizias stenograficas da ses diari, per che ses biograf designà Jonas Fränkel las possia insumma leger.

Ozendi funcziuna er la reconuschientscha dals bustabs adina pli savens en moda digitala. Entant che mo anc paucas persunas san leger la «scrittira tudestga», datti en il fratemp programs che renconuschan automaticamain questa scrittira ch'era fitg derasada durant il 19avel tschientaner. Co che quai funcziuna, declera il professer Tobias Hodel en il video.

Ina scrittira ha adina er ina grafica. Tge effect ch'in text ha, dependa er da la parita dals bustabs. Correspundentamain s'occupa in'atgna scienza da la creaziun da scrittiras. En quel reguard ha la Svizra ina reputaziun excellenta.

Tar las tipografas ed ils tipografs svizzers da renum internaziunal tutga er Karl Gerstner. Quant precis che Gerstner procediva cun crear ina scrittira e quant exact ch'el glimava vi da mintga furma dals bustabs, resorta da ses archiv che vegn tegnì en salv en la Collecziun grafica da la Biblioteca naziunala. Gerstner fascheva chapaivel, che scriver saja adina er ina dumonda dal design.

Tgi che scriva cumpona cun patratgs ina grafica. Igl è central, co ch'i vegn scrit. Trenads autramain na ston betg mo ils mauns vegnir – ch'ins scrivia cun ina plima d'auca, cun ina maschina da scriver u cun in smartphone – er ils patratgs ston currer en in auter ritmus. «Er noss material da scriver lavura vi da noss patratgs», ha Friedrich Nietzsche nudà correspundentamain.

Numerusas auturas ed auturs han scrit davart la collavuraziun da lur utensils da scriver a lur ovras: Blaise Cendrars ha ludà la musicalitad da sia Remington («Ma machine bat en cadence / Elle sonne au bout de chaque ligne»), Hermann Burger ha agiuntà en ses roman «Lokalbericht» – en vista al protagonist, las «beide nigelnagelneuen, meinetwegen jungfräulichen Schreibmaschinen» – in excurs virtuus davart la concurrenza e l'interacziun da la Hermes eleganta cun la Olivetti sportiva, e Paul Nizon ha sviluppà in'entira metaforica da la creaziun ord la mecanica dal process da scriver cun la maschina: «Bella idea, questa! Metter a pèr il charret da la maschina da scriver cun las vias dals binaris dals patratgs e cun las chargias dals patratgs.» Aglaja Veteranyi ha da l'autra vart scrit ses texts davart maternitad, l'esser figlia e la mort directamain sin in vestgi da nozzas. A chaschun d'ina performance la fin da la stad 2001 ha ella legì ils texts directamain giu da quest vestgi.

Scriver, leger, pensar e sentir vegnan savens en cumpagnia. Quai ch'è scrit è lur fastiz cuminaivel.